(Видео) Ураганот Труди го погоди мексиканскиот брег, предупредување за поплави и свлечишта

Ураганот Труди, проследен со обилни врнежи и силни ветрови, денеска погоди делови од пацифичкиот брег на Мексико. Американскиот Национален центар за урагани предупреди дека можните поплави и свлечишта би можеле да бидат опасни по живот.

— реклама —

Предупредувањето за ураган останува во сила на подрачјето од Манзанило, во сојузната држава Колима, до Капо Кориентес, во Халиско, објави АП.

Според најновите податоци на Националниот центар за урагани, ураганот од втора категорија, со постојани ветрови до 165 километри на час, се наоѓа на околу 215 километри јужно-југозападно од Капо Кориентес и 185 километри западно-југозападно од Манзанило. Се движи кон северозапад, но во соопштението не е наведена брзината на движење.

— реклама —

Се очекува центарот на ураганот да остане во близина на мексиканскиот брег до недела навечер, пред да се придвижи јужно од полуостровот Долна Калифорнија.

— реклама —

Мексиканската морнарица ги повика морепловците и жителите на крајбрежјето на максимална претпазливост поради високите бранови, обилните врнежи и опасноста од зголемување на нивото на реките, поплави и свлечишта.

Властите во сојузната држава Колима соопштија дека засега ризиците се мали, но предупредија дека обилните врнежи може да предизвикаат штети, бидејќи почвата е веќе натопена од претходните последователни бури што го погодија пацифичкиот брег.