Фејсбук страницата „Охриѓани“ објави видео во кое информира и покажува како непознати лица вандализирале простор кај Домот Лакочере, кој во изминатите години, како што наведуваат, бил обновен со донации и претворен во мултифункционален објект за локалната заедница.
Во објавата се тврди дека група млади лица, меѓу кои имало и девојки, престојувале на локацијата, консумирале алкохол и оштетиле дел од инвентарот.
„Имате два дена да се извините, инаку ќе ве направиме многу популарни“, порачуваат од страницата, додавајќи дека, доколку го утврдат идентитетот на сторителите, нивните имиња ќе бидат јавно објавени.
Според објавеното, случајот е пријавен во полиција, која извршила увид и ги подигнала потребните докази. Од „Охриѓани“ велат дека преку снимки од приватни безбедносни камери веќе утврдиле со какви возила пристигнале лицата и очекуваат наскоро да биде откриен нивниот идентитет.
Од страницата изразуваат разочараност поради уништувањето на просторот, нагласувајќи дека бил обновен со заеднички напори и со поддршка од граѓаните, а особено што вандализмот се случил непосредно пред празникот Света Недела.
