(Видео) Воен авион од Москва слета во Израел, идентитетот на патниците е непознат

Руски воен авион „Туполев Ту-154“, кој се користи за превоз на високи функционери и воен персонал, слетал во неделата вечерта на аеродромот „Бен Гурион“, во близина на Тел Авив, објави израелскиот јавен сервис Кан.

Причината за посетата, како и идентитетот на патниците, остануваат непознати.

Како што наведува Кан, леталото полетало од воената воздухопловна база „Чкаловски“, во близина на Москва, а во Израел слетало нешто пред 21 часот по локално време.

— реклама —

Летот првично бил забележан преку апликација за следење на авионски летови, а Кан подоцна објавил и снимки од авионот на аеродромската писта.

— реклама —

Станува збор за авион од типот „Ту-154М“, со регистрациска ознака RA-85042, со кој управува 223-та летачка единица на Министерството за одбрана на Русија.

Не е познато кој се наоѓал во авионот, ниту која била причината за патувањето во Израел.

Портпаролот на израелската војска, кабинетот на израелскиот премиер и Амбасадата на Русија во Израел одбиле да дадат коментар.

— реклама —

Како што пренесува израелскиот портал „Аруц Шева“, ваквиот лет се смета за многу необичен, бидејќи во последните неколку години не бил забележан сличен случај.

— реклама —

Било предвидено авионот да го напушти Израел во понеделник попладне.

Новинарот на Кан, Итаи Блументал, кој прв ја објавил веста, го поврзал летот со воените односи меѓу Русија и Израел, конкретно со присуството на руските сили во Сирија.

Сепак, тој нагласил дека не постојат докази кои директно би ја поврзале оваа посета со односите со Иран или со ситуацијата во Сирија, пренесува италијанскиот весник „Il Sole 24 Ore“.