Рускиот претседател Владимир Путин денес на воената парада на Црвениот плоштад, по повод одбележувањето на победата над нацистичка Германија во Втората светска војна, изрази уверување дека Русија ќе победи во војната против Украина.
Безбедносните мерки во Москва беа засилени додека Путин и бројни странски лидери ја следеа парадата, иако тридневното примирје посредувано од САД ги намали стравувањата од можни украински обиди за попречување на церемонијата.
Путин, кој е на власт повеќе од четврт век, Денот на победата, најважниот световен празник во Русија, го користи за демонстрација на воената моќ на земјата и за зајакнување на поддршката за војната во Украина, која трае веќе петта година.
Говорејќи на парадата, Путин ги пофали руските сили кои се борат во Украина, тврдејќи дека „се соочуваат со агресивна сила која е вооружена и поддржана од целиот НАТО сојуз“. „Победата секогаш била и ќе биде наша“, рече Путин додека единиците беа построени на Црвениот плоштад.
„Клучот за успехот се нашата морална сила, храброст и херојство, нашето единство и способноста да издржиме сè и да го надминеме секој предизвик“, додаде тој.
Но, овогодишната парада првпат по речиси две децении се одржа без тенкови, проектили и друга тешка вооружена техника, освен традиционалниот прелет на борбени авиони.
Руските функционери ја објаснија наглата промена на форматот со „моменталната оперативна ситуација“ и предупредија на закана од можни украински напади.
Портпаролот на Кремљ Дмитриј Песков рече дека властите презеле „дополнителни безбедносни мерки“.
Русија еднострано прогласи примирје за петок и сабота, додека украинскиот претседател Володимир Зеленски објави прекин на огнот кој требаше да почне во среда. Но, ниту едно примирје не стапи на сила бидејќи двете страни меѓусебно се обвинуваа за продолжување на нападите.
Претседателот на САД Доналд Трамп вчера објави дека Русија и Украина го прифатиле неговото барање за примирје од сабота до понеделник и размена на заробеници, оценувајќи дека прекинот на конфликтот би можел да биде „почеток на крајот“ на војната.
Зеленски, кој претходно оваа недела рече дека руските власти „се плашат дека дронови би можеле да зујат над Црвениот плоштад“ на 9 мај, по објавата на Трамп донесе декрет со кој саркастично ѝ „дозволи“ на Русија одржување на парадата и привремено го прогласи Црвениот плоштад за забранета зона за украински напади.
Песков го отфрли декретот како „глупава шега“.
„Не ни треба ничие дозволување за да бидеме горди на Денот на победата“, рече тој пред новинарите.
Руската армија последните месеци полека, но континуирано напредува долж повеќе од илјада километри долга линија на фронтот. Украина истовремено сè поефикасно изведува далекосежни напади на руските енергетски постројки, фабрики и воени складишта. Киев развил дронови способни да гаѓаат цели оддалечени повеќе од илјада километри во Русија, што пред 2022 не беше можно.
Руските власти предупредија дека ако Украина се обиде да ги попречи денешните свечености, Русија ќе изведе „масовен ракетен напад на центарот на Киев“. Руското министерство за одбрана ги предупреди цивилите и вработените во странските дипломатски мисии „веднаш да го напуштат градот“. Европската Унија порача дека нејзините дипломати нема да ја напуштат украинската престолнина и покрај руските закани.
Путин со години ги користи прославите на Денот на победата за поттикнување на националната гордост и нагласување на статусот на Русија како глобална сила. Советскиот Сојуз изгубил 27 милиони луѓе во Втората светска војна, која во Русија ја нарекуваат Голема татковинска војна, а таа огромна жртва оставила длабок траг во националната свест.
Парадите на Црвениот плоштад од 2008 редовно вклучуваа тешко вооружување, од оклопни возила до интерконтинентални балистички проектили со нуклеарни боеви глави. Оваа година бројни помали паради низ земјата се намалени или целосно откажани од безбедносни причини.
Властите денес, додека единиците се подготвуваа за марш преку Црвениот плоштад, го ограничија пристапот до мобилен интернет и СМС услуги во Москва, наведувајќи безбедносни причини.
На прославата пристигнаа малезискиот крал султан Ибрахим Искандар, претседателот на Лаос Тонглун Сисулит, казахстанскиот претседател Касим-Жомарт Токаев, узбекистанскиот претседател Шавкат Мирзијоев и белорускиот Александар Лукашенко.
Словачкиот премиер Роберт Фицо, чија земја е членка на Европската Унија, планира да се сретне со Путин и да положи цвеќе на Гробот на непознатиот војник покрај ѕидините на Кремљ, но не присуствуваше на самата парада на Црвениот плоштад.
(Видео) Започна воената парада по повод Денот на победата во Москва
Традиционалната воена парада по повод 81-годишнината од победата во Втората светска војна започна на Црвениот плоштад во Москва, со присуство на високи гости од неколку земји, јавува дописникот на РИА Новости.Како што претходно соопшти Министерството за одбрана на Русија, низ пешадиската колона по калдрмата на Црвениот плоштад ќе поминат припадници на повисоките воени училишта од сите родови и видови на армијата.Поради актуелната ситуација, оваа година во парадата нема да учествуваат ученици од одредени воени школи, кадетски корпуси, како и колона воена техника, наведоа од Министерството.Доколку временските услови бидат поволни, парадата ќе заврши со прелет на борбената авијација, при што формацијата традиционално ќе ја затворат шест јуришни авиони Су-25, кои ќе го обојат небото над Москва во боите на руското знаме.Претходно, помошникот на претседателот на Русија Јуриј Ушаков соопшти дека Москва на Денот на победата ќе ја посетат лидери на Абхазија Бадра Гунба, Јужна Осетија Алан Гаглоев, Белорусија Александар Лукашенко, Лаос Тјонглун Сисулит, Узбекистан Шавкат Мирзијоев, премиерот на Словачка Роберт Фицо, врховниот владетел на Малезија султан Ибрахим и раководството на Република Српска.
Свет | пред 1 час
