Во сараевската населба Нова Отока се случила сообраќајна несреќа во која автомобил завршил превртен на покрив во пешачка зона.
Во несреќата е повредено едно лице, кое е пренесено во Клиничкиот универзитетски центар во Сараево, каде што му била укажана лекарска помош, пренесува „Дневни Аваз“.
Надзорна камера во близина на местото на несреќата го снимила моментот кога возилото се превртело, како и две жени кои во последен момент успеале да се тргнат и да избегнат удар од автомобилот што се движел кон нив.
Според неофицијални информации, возачот претекнувал други возила, по што удрил во сообраќаен знак и изгубил контрола над автомобилот, кој потоа се превртел на покрив.
Од Оперативниот центар на Министерството за внатрешни работи на Кантонот Сараево потврдиле дека во несреќата учествувало едно возило.
„Едно лице е повредено и е пренесено на Клиничкиот универзитетски центар“, соопштиле од полицијата.
Причините за несреќата се утврдуваат, а истрагата е во тек.
