Необична драма се случила синоќа на саемот „Sommerdom“ во Хамбург, откако 23 лица останале заглавени на височина од околу 30 метри поради технички дефект на вртелешка со синџири.
Атракцијата застанала доцна навечер, при што патниците останале во воздухот околу три часа. На местото пристигнале полицијата и пожарникарите, а била започната голема операција за безбедно спуштање на луѓето и спречување на паника.
Според германските медиуми, вртелешката повторно проработела нешто по полноќ, по што сите 23 лица успеале безбедно да се спуштат и да ја напуштат атракцијата. Никој не бил повреден, а немало потреба пожарникарите директно да ги извлекуваат патниците.
Причината за дефектот треба да биде утврдена во рамките на истрагата, во која се очекува да биде вклучена и германската организација за технички преглед TÜV.
Вртелешката е дел од саемот „Sommerdom“, кој во Хамбург ќе трае до недела. Оваа година саемот за првпат се одржува пет недели, наместо досегашните четири. Минатогодишното издание го посетиле повеќе од 1,3 милиони луѓе, според организаторите.
