Претседателот на Србија Александар Вучиќ изјави дека српската војска станува сè посилна и дека одбранбените капацитети на земјата дополнително ќе се зајакнат со воведување на задолжителен воен рок, чиј почеток е планиран за март 2027 година. Изјавата беше дадена за време на презентацијата на нови и модернизирани средства на Војската на Србија на воениот аеродром во Батајница кај Белград.
Одговарајќи на новинарско прашање за споредба на српската војска со армиите во регионот, Вучиќ оцени дека воведувањето на воениот рок дополнително ќе ја зајакне одбраната на државата.
„Нашата војска станува сè посилна, а ќе бидеме уште посилни кога ќе започне воениот рок. Тоа дополнително ќе ги зајакне нашите одбранбени капацитети“, рече тој.
Според неговите зборови, првите регрути на краток воен рок ќе започнат со служба во март 2027 година, што, како што смета, ќе придонесе за поголема одговорност и сериозност кај младите.
„Во март почнуваме со служење на краток воен рок, што мислам дека ќе донесе добро за сите мажи и многу девојки, како и многу поголема одговорност, сериозност и поинаков поглед на животот“, додаде тој.
На настанот беше претставен и кинескиот ракетен систем HQ-17, наменет за противвоздушна одбрана на помали објекти и воени единици. Досегот на системот е 15 километри, а максималната висина на дејство е осум километри. Вучиќ рече дека овие системи, во рамки на слоевитата одбрана, ги штитат Ниш и Крагуевац.
„Сè што требаше, го заштитивме со посилни системи како FK-3 и други противвоздушни средства, но овој систем е особено наменет за градови како Ниш и Крагуевац“, појасни тој. Тој нагласи дека системот ја штити и критичната енергетска инфраструктура, како гасни компресори и компресорски станици, чија заштита ја оцени како најважна.
Вучиќ наведе и дека Војската на Србија располага со кинески, руски и француски ракети и дека нивниот број ќе се зголемува.
На презентацијата беше прикажан и модернизираниот авион „Орао“ со ознака M1A, наменет за огнена поддршка и офанзивни дејствија во сложени временски услови. Авионот, покрај класичното вооружување, носи и наведувани средства, меѓу кои се издвојува наведувана бомба FT-6 со дострел од околу 80 километри, која се води преку сателитска и инерцијална навигација.
Беше претставена и VRVZ-200, српска наведувана ракета воздух–земја со дострел од 30 до 40 километри, развиена за модернизираните јуришни авиони J-22 „Орао“. Прикажана беше и телевизиски наведуваната ракета AGM-65 Maverick, со дострел од околу 20 километри.
На настанот беше прикажан и борбениот хеликоптер Ми-35М од составот на 714. противоклопна хеликоптерска ескадрила, кој со своето вооружување може да испали меѓу 3000 и 3600 куршуми во минута.
