Дојде до жестока вербална расправија во Собранието на Црна Гора меѓу пратеникот на Демократската народна партија (ДНП), Милан Кнежевиќ, и министерот за внатрешни работи Данило Шарановиќ, по што седницата беше прекината.
Поголем инцидент спречија присутните пратеници, кои застанаа меѓу двајцата и не дозволија расправијата да прерасне во физичка пресметка. Меѓу нив беа пратеникот на ДПС, Андрија Николиќ, претставникот на ГП УРА, Милета Радованиќ, и пратеникот на Демократите, Момчило Лековиќ.
Инцидентот се случи за време на расправата за повеќе законски предлози поврзани со регистрите, живеалиштето и престојувалиштето, црногорското државјанство, централниот регистар на населението и личното име.
Расправијата започна откако Кнежевиќ тврдеше дека Шарановиќ, додека бил на одмор на Ада Бојана, го обезбедувале 50 полицајци. Министерот ги отфрли обвинувањата како лага, по што Кнежевиќ остана на своето тврдење.
Шарановиќ потоа изјави дека Кнежевиќ има поголемо обезбедување од него, што пратеникот го демантираше, тврдејќи дека го обезбедуваат само две лица.
Вербалната пресметка кулминираше кога Шарановиќ го нарече Кнежевиќ „најголемиот лажго во Собранието“, а Кнежевиќ возврати со навредата „ти си најголемата битанга во парламентот“, пренесуваат црногорските медиуми.
