Спасувачкото куче Цунами стана симбол на надежта по разорните земјотреси што минатата недела ја погодија Венецуела, откако помогна во спасувањето на најмалку 13 лица заробени под урнатините. За деветгодишниот граничен коли ова беше и последната спасувачка мисија пред заминувањето во пензија.
Во двата силни земјотреса со јачина од 7,2 и 7,5 степени, кои се случија во интервал од само 39 секунди, беа урнати околу 250 објекти, а според официјалните податоци загинаа речиси 2.000 луѓе.
Цунами, заедно со својот водич Хорхе Бинс, бил дел од спасувачката единица K-SAR ECID. Благодарение на исклучително развиеното сетило за мирис, кучето успевало да ги лоцира преживеаните под урнатините и прецизно да ги означи местата каде што спасувачките екипи требало да започнат со расчистување.
Меѓу спасените е и 60-годишен маж кој бил извлечен жив по шест дена минати под урнатините. Цунами и претходно учествувал во бројни спасувачки акции, меѓу кои и по земјотресите во Турција и Сирија, како и во интервенции при поплави и свлечишта низ Венецуела.
Неговата животна приказна е уште повпечатлива. Како мало кученце бил пронајден напуштен, малтретиран и сериозно неухранет на улиците во Каракас. Го спасила Анита Видал, а подоцна неговите способности ги забележал спасувачот Хорхе Бинс, кој го вклучил во специјализираниот центар за обука на кучиња за спасување при катастрофи.
По последната акција ветеринарите утврдиле дека Цунами е физички исцрпен. По лекарски третман и инфузија, било потврдено дека е во добра здравствена состојба, но надлежните одлучиле дека е време заслужено да се пензионира.
Неговите снимки од спасувачките акции брзо се проширија на социјалните мрежи, каде што многумина го нарекоа вистински херој.
Според последните информации, повеќе од 43.000 лица сè уште се водат како исчезнати, над 5.000 се повредени, а повеќе од 15.000 останале без своите домови. Во спасувачките операции учествуваат илјадници спасувачи и повеќе од сто специјално обучени кучиња од триесетина земји.
