На сила стапија измените на Законот за безбедност на сообраќајот на патиштата, со кои се воведуваат построги правила за користење на електричните тротинети. Но, и покрај новите законски ограничувања, на скопските улици и понатаму може да се видат возачи кои се движат по булевари меѓу автомобили, со брзина слична на онаа на моторните возила, без заштитна опрема и без да ги почитуваат ниту досегашните прописи.
Собранието ги усвои законските измени по скратена постапка, со цел да се воведе поголем ред во користењето на лесните електрични возила и да се намали ризикот од сообраќајни несреќи.
Една од најзначајните новини е ограничувањето на максималната дозволена брзина на електричните тротинети на 20 километри на час, согласно препораките на Европската Унија.
Со измените се зголемува и старосната граница за управување со електричен тротинет. Отсега, вакво возило ќе може да управува само лице кое има наполнето најмалку 18 години.
Законот предвидува и значително построга казнена политика. Освен парични казни, во одредени случаи ќе биде можно и одземање на тротинетот, особено ако со него управува малолетник, ако се надмине дозволената брзина, ако се превезува уште едно лице или ако возачот е под дејство на алкохол.
И покрај овие измени, на терен и натаму се забележуваат бројни прекршувања. Возачи на електрични тротинети секојдневно се движат по коловозите на главните булевари, се провлекуваат меѓу автомобили и развиваат брзина која често е поголема од законски дозволената, без кациги и друга заштитна опрема.
Новите законски одредби треба да овозможат поефикасно санкционирање на ваквите прекршоци, но останува да се види дали ќе следуваат и засилени контроли на терен за нивна доследна примена.
