Украинскиот амбасадор во Обединетото Кралство, Валериј Залужни, остро го осуди ноќниот руски напад врз Киев и околниот регион, оценувајќи дека станува збор за „отворен терор врз цивилното население“ и повика на посилна реакција од западните сојузници.
Во објава на социјалните мрежи, Залужни истакна дека руските сили продолжуваат да ги напаѓаат Киев и другите украински градови затоа што, како што наведе, се чувствуваат неказнето.
„Ова не е прашање на воена логика – ова е отворен терор врз цивилното население и уништување на цивилната инфраструктура. Тоа може да се запре само со ефикасна помош од западните сојузници. Светот мора да реагира, во спротивно преседанот на ‘војна против градови’ ќе продолжи да се шири“, порача Залужни.
Украинскиот претседател Володимир Зеленски соопшти дека во нападот загинале 17 лица, а 44 се повредени.
Според украинските власти, Русија во текот на ноќта лансирала четири противбродски ракети „Циркон“/„Оникс“ и 24 балистички ракети „Искандер-М“/С-400. Украинската противвоздушна одбрана, според официјалните информации, не успеала да пресретне ниту една од балистичките ракети.
Во киевскиот округ Голосеевски избувнал пожар во нестанбен објект, при што дошло и до истекување амонијак. Во повеќе делови од главниот град гореле магацини и други објекти, а поради големите пожари квалитетот на воздухот значително се влошил.
Пожари биле регистрирани и во складишта, логистички центри и други објекти во регионите Бровари, Буча и Фастив.
Украинските железници соопштија дека има загинати лица на железничка платформа во Бровари, поради што дел од возовите биле пренасочени по ноќното гранатирање.
