(Видео) „Замолчи!“: Трамп повторно во остар конфликт со новинарка

Американскиот претседател Доналд Трамп повторно влезе во вербален судир со новинарка, откако таа го праша дали сака во групата новинари што го следат претседателот да бидат присутни само медиуми кои го поддржуваат.

Инцидентот се случил при заминувањето од Белата куќа. Дописничката на MS Now, Акејла Гарднер, го прашала Трамп дали сака во новинарската група да бидат само медиуми кои известуваат позитивно за него.

— реклама —

„Не, не, не. Сакам вистински вести, а не лажни вести, како вас“, одговорил Трамп.

Кога Гарднер го прашала дали тоа значи дека не сака тешки прашања, Трамп ѝ одговорил да „замолчи“, по што повторно ги критикувал CNN и MS Now. Притоа, MS Now го нарекол „MSDNC“, навредлив назив со кој се алудира на наводна поврзаност на медиумот со Демократската партија.

— реклама —

Односите меѓу Трамп и дел од медиумите дополнително се вжештија во последните денови. Само ден претходно, Белата куќа го спречила тимот на CNN да патува со претседателскиот авион „Air Force One“ и да известува за неговата посета на Тенеси.

Новинарите на CNN и MS Now во последните денови се соочуваат со ограничувања во пристапот до претседателот. Минатиот викенд администрацијата им ги укинала акредитациите на MS Now, „Политико“ и CNN.

Федерален судија во четвртокот привремено им го вратил пристапот на овие медиуми, но истиот ден соработници на Трамп ги спречиле нивните новинари и продуценти да известуваат од државната вечера организирана во чест на кинескиот претседател Си Џинпинг.

— реклама —

Судирите на Трамп со медиумите не се нови. Уште за време на претседателската кампања во 2016 година тој често ги напаѓаше новинарите и медиумските куќи чие известување го сметал за непријателско, а изразот „лажни вести“ стана еден од неговите најчесто користени термини во критиките кон медиумите.

Во текот на првиот претседателски мандат, Трамп повеќепати влегуваше во остри расправии со новинари на прес-конференции, на одредени новинари им беше ограничуван пристапот, а тој јавно ги критикуваше големите телевизиски мрежи и медиумски организации.

Еден од најпознатите случаи се случи во 2018 година, кога по жестока размена со Трамп на прес-конференција, на дописникот на CNN, Џим Акоста, привремено му беше одземена акредитацијата од Белата куќа.

View this post on Instagram