Украинскиот претседател Володимир Зеленски изјави дека руското раководство „полуде од војната“ и продолжува да ја одбива можноста за прекин на инвазијата, откако Русија во текот на ноќта изврши нов бран напади врз повеќе украински градови.
Во објава на Телеграм, Зеленски истакна дека руските сили повторно гаѓале исклучиво цивилни цели.
„Русите повторно ги ‘поразија’ само цивилните објекти – обични патнички автобуси во Одеса, станбени згради во Запорожје и болница во Харковската област. Целиот свет гледа дека на Украина ѝ е потребна посилна противвоздушна одбрана и подобра заштита на човечките животи, а руското раководство полуде од војната и на целосно ирационален начин одбива да ја запре“, порача Зеленски.
Тој повика на построги санкции против Москва, нови пакети воена помош и заеднички европски одбранбени иницијативи, меѓу кои и предложениот противбалистички систем „ФРЕЈЈА“.
Во меѓувреме, Русија лансирала нов бран беспилотни летала кон Украина. Во Одеса била погодена транспортна компанија, при што се запалиле неколку автобуси, а оштетени биле и четири куќи. Повредени се четири лица, меѓу кои и петгодишно дете.
Во Запорожје, по нападите со беспилотни летала, најмалку пет лица биле хоспитализирани. Четириесет и едногодишна жена и 15-годишно момче се наоѓаат во критична состојба, а оштетени се станбени објекти, возила и една болница.
Според украинските воздухопловни сили, Русија во текот на ноќта лансирала три наведувани ракети „Х-59/69“ и 134 беспилотни летала, меѓу кои ударни дронови „Шахед“ и мамки-дронови. Украинската противвоздушна одбрана ги соборила сите три ракети и неутрализирала 123 беспилотни летала, но шест ударни дронови погодиле цели на пет различни локации, додека остатоци од пресретнатите летала паднале на уште четири места.
