Градоначалникот на Скопје, Орце Ѓорѓиевски, изјави дека Жичницата на Водно се наоѓа во „катастрофално лоша состојба“, по контрола извршена од компанијата „Допелмаер“, која е изведувач на проектот.
Според него, инспекцијата покажала сериозни недостатоци кои мора да бидат сервисирани пред жичницата повторно да биде пуштена во употреба.
„Нема ништо повредно во Скопје и во Македонија од човечкиот живот, а состојбата во која се наоѓаме во моментов се однесува на неодговорното однесување на моите претходници“, рече Ѓорѓиевски.
Тој посочи дека за првпат откако е поставена жичницата, била направена контрола од страна на „Допелмаер“.
„По инспекцијата е констатирано дека Жичарата се наоѓа во катастрофално лоша состојба и дека има многу недостатоци кои треба да бидат сервисирани во наредниот период“, изјави градоначалникот.
Ѓорѓиевски рече дека заедно со директорот на ЈСП, Саше Илиески, веќе побарале понуда за тоа колку би чинела целосната санација и дефектажа.
„Побаравме понуда да видиме колку ќе го чини јавното претпријатие и Градот сето она што би значело целосна дефектажа и враќање на Жичарата во состојба во која што јас ќе бидам пред сè сигурен дека секое дете, секој граѓанин на Градот Скопје ќе биде сигурен кога ќе ја користи истата“, рече тој.
Додаде дека од компанијата се очекува и финансиска пресметка, како и план со временска рамка за потребните активности.
„Веднаш штом ги добиеме понудата, цената и временскиот рок за колку би се сработило, веднаш ќе ја информираме јавноста“, изјави Ѓорѓиевски.
