Жичницата на Водно ќе остане надвор од функција на неопределено време, а засега нема рок кога повторно ќе биде пуштена во употреба. Од Град Скопје за „Скопје1“ велат дека системот бил затекнат во исклучително лоша состојба поради, како што наведуваат, децениска негрижа, поради што е неопходен темелен ремонт пред повторно да им биде достапен на граѓаните.
„Во однос на Вашето прашање за Жичницата на Водно, сакаме да Ве информираме дека таа во моментов не е во функција поради исклучително лошата состојба во која е затекната поради децениската негрижа“, велат од Град Скопје.
Оттаму посочуваат дека Жичницата нема да биде пуштена во употреба сè додека не се изврши целосен сервис и не се обезбедат сите неопходни сертификати кои ќе потврдат дека системот е безбеден за користење.
„Жичницата ќе остане затворена сè додека не биде извршен целосен сервис и додека не бидат обезбедени сите потребни сертификати со кои ќе се потврди дека е целосно безбедна за користење.“
За таа намена, со ребалансот на Буџетот се обезбедени околу 300.000 евра.
„Со ребалансот на Буџетот се издвоени околу 300.000 евра за голем и темелен ремонт на целиот систем. Ќе бидат проверени и сервисирани сите негови делови, без импровизации и без компромиси кога станува збор за безбедноста на граѓаните.“
Од Градот нагласуваат дека безбедноста на посетителите е приоритет и дека Жичницата нема повторно да профункционира додека не бидат завршени сите проверки.
„Човечкиот живот и безбедноста на посетителите се наш апсолутен приоритет. Нема да дозволиме поради долгогодишна неодговорност и несоодветно одржување да биде доведен во опасност кој било граѓанин.
Жичницата на Водно повторно ќе биде ставена во функција единствено по целосното завршување на ремонтот, извршувањето на сите стручни проверки и добивањето на потребните безбедносни сертификати“, наведуваат од Град Скопје.
