СДСМ ја обвини Владата дека повторната продажба на запленетите станови на поранешниот премиер Никола Груевски не претставува вистинска правда, оценувајќи дека Груевски и понатаму живее во луксуз во Унгарија, додека, според партијата, државата не прави доволно за негова екстрадиција.
Од СДСМ наведуваат дека во момент кога граѓаните се соочуваат со економски тешкотии, државата повторно продава дел од конфискуваниот имот на Груевски.
„Додека граѓаните се дават во долгови и се соочуваат со минимална плата од 400 евра, државата повторно се обидува да продаде дел од запленетиот имот на Никола Груевски – човекот кој избега во Унгарија и таму продолжува да живее во луксуз, наместо да ја издржува казната во Идризово. Така изгледа кога криминална организација е на власт“, соопшти СДСМ.
Од партијата тврдат дека запленетите станови претставуваат само мал дел од имотот со кој, според нив, располага Груевски.
„Се продаваат станови и имот во вредност од неколку милиони евра, додека Груевски и неговото семејство располагаат со имот и средства во вредност од над две милијарди евра“, наведуваат од СДСМ.
Во соопштението се упатуваат и критики кон премиерот Христијан Мицкоски и ВМРО-ДПМНЕ, со тврдење дека не преземаат доволно активности за екстрадиција на поранешниот премиер.
„Не бараат негова екстрадиција, ниту ја осудуваат неговата политика на страв и системска кражба на државата. Месеци наназад нема одговор на прашањето дали се испратени документите за негово испорачување“, наведува СДСМ.
Партијата обвинува дека Мицкоски ја продолжува политиката на Груевски.
„Наместо тоа, Мицкоски продолжува по стапките на својот ментор – носи скапи часовници, купува владини авиони и ја одржува културата на недопирливост и лично богатење на грбот на граѓаните. Се сеќаваме на мерцедесот од 650.000 евра, наочарите од 60.000 евра и луксузот во кој пловеше Груевски. Денес истото го гледаме и кај Мицкоски, само во понова и поагресивна верзија“, се наведува во реакцијата.
Од СДСМ оценуваат дека продажбата на неколку станови не претставува доволна сатисфакција и дека, според нив, вистинската правда подразбира екстрадиција на Груевски и конфискација на целиот негов имот.
„Имотот на Груевски во Македонија е само ситница. Вистинската сума од над две милијарди евра се наоѓа надвор од земјата. Наместо Груевски да биде испорачан и да одговара за изгубените години на цела генерација Македонци, да се конфискува тој имот и тие пари, Владата продава само неколку станови. Така изгледа правдата со Мицкоски и неговата банда“, наведува СДСМ.
Во соопштението партијата порачува дека ќе продолжи да бара одговорност за, како што наведува, сите инволвирани во случаите поврзани со поранешната власт.
