Виткоф и Кушнер пристигнаа во Киев: Зеленски ги пречека со прегратка

Американските пратеници Стив Виткоф и Џаред Кушнер пристигнаа во Киев, каде што ги продолжуваат разговорите за можностите за завршување на војната во Украина.

На Софискиот плоштад во Киев ги пречека украинскиот претседател Володимир Зеленски, кој го поздрави Виткоф со прегратка и со зборовите: „Мило ми е што те гледам, Стив“.

— реклама —

Посетата на Киев следува еден ден по тричасовниот разговор на Виткоф и Кушнер со рускиот претседател Владимир Путин во Москва. Ова е нивна прва посета на Украина, откако повеќепати престојуваа во Русија.

Целта на посетата е да се забрзаат дипломатските напори за завршување на војната, но деталите од можниот мировен предлог сè уште не се објавени.

— реклама —

Разговорите се темелат на мировниот план со 20 точки што Вашингтон и Киев го предложија во декември. Сепак, меѓу двете страни и понатаму постојат несогласувања околу клучни прашања, меѓу кои и контролата врз териториите во источна Украина.

— реклама —

Од Белата куќа во саботата соопштија дека на средбата во Москва биле разгледани конкретни планови за следните чекори кон завршување на војната, а официјалното соопштение се очекува во следните недели.

Во меѓувреме, и покрај договорениот тридневен прекин на нападите врз главните градови за да се овозможи безбедно патување на преговарачите, нападите продолжуваат во други делови на Украина. Украинските власти соопштија дека во последните 24 часа низ земјата загинале најмалку осум лица, а 69 биле повредени.

Киев и околината повеќе од една недела се соочуваат со речиси секојдневни напади со беспилотни летала. Зеленски претходно соопшти дека планираниот лет на американските пратеници до Москва бил откажан поради руските напади врз два аеродрома во близина на Киев.

Украина истовремено се соочува со недостиг на ракети за системите „Патриот“, додека Русија во последните недели ги засили нападите со ракети со долг дострел и нови модели беспилотни летала.