Владата на Република Македонија преку соопштение ги отфрли како невистинити обвинувањата на СДСМ поврзани со набавката на флаширана вода за граѓаните на Гостивар, оценувајќи дека станува збор за, како што наведува, „целосно измислени дезинформации“ и обид за манипулација со јавноста.
Во реакцијата се посочува дека Владата останува на ставот дека ќе продолжи бесплатно да обезбедува безбедна вода за пиење за жителите на Гостивар сè додека надлежните институции официјално не потврдат дека водата од водоводниот систем е исправна за употреба.
Од Владата потврдуваат дека постапката за набавка на флаширана вода ја спровела Службата за општи и заеднички работи, а договорот го добила компанијата „Кожувчанка“. Според нив, цената по која се набавува водата изнесува 12,5 денари за шише од 1,5 литри, што е значително пониско од малопродажната цена, која, како што наведуваат, изнесува најмалку 25 денари.
Во соопштението се додава дека пониската цена е резултат на придонесот на компанијата „Кожувчанка“, која учествувала во набавката со цел да им помогне на граѓаните и институциите во услови на кризна состојба.
Од Владата оценуваат дека фактите се лесно проверливи и дека, како што велат, обидите за нивно искривување нема да ја променат вистината. Воедно, упатија апел до СДСМ да престане, како што наведуваат, со пласирање невистинити информации.
