Претседателката на Либерално-демократската партија (ЛДП) и пратеничка, Моника Зајкова, денеска од собраниската говорница остро реагираше откако пратениците од владејачкото мнозинство не ги поддржаа измените и дополнувањата на Законот за платежни услуги и платни системи, со кои, според ЛДП, требало да се намалат непотребните банкарски провизии и да се олесни финансискиот товар врз граѓаните.
Зајкова оцени дека владејачкото мнозинство повторно застанало на страната на банките, наместо на страната на граѓаните.
„Денес не одлучуваме за интересите на банките. Денес одлучуваме дали сме на страната на граѓаните или на страната на банкарските профити. Три години ЛДП го отвора ова прашање. Три години предупредуваме дека не е нормално граѓаните да плаќаат сѐ повисоки провизии додека банките бележат рекордни добивки“, изјави Зајкова.
Таа посочи дека во услови на економски предизвици и раст на цените, дополнителното зголемување на банкарските провизии претставува дополнителен товар за граѓаните.
„Банките не создаваат профит во празен простор. Тој профит доаѓа од секој работник, секој пензионер, секој студент и секое семејство кое е принудено да користи банкарски услуги. Затоа е сосема оправдано државата да постави граници таму каде што јавниот интерес е загрозен“, истакна претседателката на ЛДП.
Зајкова нагласи дека денес граѓаните практично се обврзани да користат банкарски услуги бидејќи платите, пензиите и социјалните надоместоци се исплаќаат преку банкарскиот систем, поради што, како што рече, државата има обврска да ги заштити од неоправдани трошоци.
Во своето обраќање таа ги повика пратениците да го поддржат законското решение, оценувајќи дека станува збор за избор меѓу интересот на граѓаните и интересот на профитерите.
„ЛДП е на страната на граѓаните. Очекуваме и вие денес да бидете таму“, порача Зајкова.
Сепак, предлог-законот не доби поддршка од пратениците од владејачкото мнозинство, по што од ЛДП оценија дека власта повторно ги ставила интересите на банките пред интересите на граѓаните.
