По изборот на Изет Меџити за градоначалник на Чаир, коалицијата ВЛЕН очекува неговите досегашни владини позиции – заменик-премиер и министер за животна средина – да ѝ припаднат на партијата.
Вицепремиерот за политики за добро владеење Арбен Фетаи изјави дека Влен ќе предложи Беким Сали за заменик-премиер, а дополнително ќе номинира уште едно лице за министер за животна средина.
„Изет Меџити имаше две функции во Владата – министер за животна средина и заменик-премиер. Ние сметаме дека треба да предложиме уште едно име, министер за животна средина. Верувам дека оваа недела ќе седнеме со премиерот како мандатар, најдоцна до утре, и ќе најдеме заедничко решение,“ изјави Фетаи.
Тој додаде дека разговорите со премиерот ќе се одвиваат конструктивно и дека очекуваат брзо разрешување на кадровските прашања.
