Доколку утре се одржат парламентарни избори, ВМРО-ДПМНЕ би освоила повеќе од 60 пратенички места во Собранието, тврдат од партијата, повикувајќи се на резултатите од локалните избори и споредбата со Донтовиот модел на распределба на мандати.
Од ВМРО-ДПМНЕ соопштуваат дека со освоени 550 советнички места низ државата и над 300.000 гласови, партијата е „апсолутен победник“ на локалните избори и дека резултатот е јасен показател за расположението на граѓаните.
„Народот го казни СДС и направи да биде на некои места низ државата, како и во градот Скопје, трета, четврта, па дури и петта партија по број на добиени гласови. Времето на работа, одговорност и резултати продолжува. Благодарност до сите кои го направија вистинскиот избор“, велат од ВМРО-ДПМНЕ.
Според пресметките на партијата, ВМРО-ДПМНЕ има 12.000 гласа повеќе отколку на локалните избори во 2021 година, додека СДСМ изгубила над 111.000 гласа. „Ова е пораз кој најдобро ја отсликува недовербата на граѓаните во нивните промашени политики, неспособно владеење и неквалитетни кадри“, стои во соопштението.
Од ВМРО-ДПМНЕ додаваат дека партијата има најголема поддршка во 59 општини и градот Скопје, а во мнозинството од нив и апсолутно мнозинство во советите, што, како што наведуваат, е доказ дека граѓаните избрале стабилност, развој и чесно работење.
„Граѓаните избраа пат на раст и развој, а не застој и пропаѓање. Со оваа поддршка, ВМРО-ДПМНЕ уште еднаш покажа дека е партија на народот, што ги слуша граѓаните и работи за нив“, се наведува во партиското соопштение.
Од партијата повикуваат поддржувачите масовно да излезат и во вториот круг од локалните избори и, како што порачуваат, „да ја потврдат волјата на народот со заокружување на бројот 9 – со својот човек, за своето место, за својата иднина“.
