Пратеничката на СДСМ Марија Костадинова при реплика на седницата на парламентот посветена на избор на новата влада во врска со обвинувањата на опозицијата истакна дека државата беше ФИРОМ и нашиот македонски јазик не беше признат, државата беше изолирана, поделена и заробена, а денеска сме пријатели со сите, додека опозицијата со Хунзите и антиквизацијата го загрози нашиот идентитет.
ВМРО-ДПМНЕ е најмалку повикана да зборува за идентитетот, посебно затоа што ликот и делото на еден од најголемите великани Блаже Конески го нарековте „џуџето од Небрегово“, за 11 години криминално владеење ВМРО-ДПМНЕ не направи ништо за унапредување на македонскиот јазик, напротив 11 години работеше за всадување на измислен антички идентитет , газејќи врз коските на преродбениците, просветителите и кодификаторите на македонскиот јазик, само затоа што македонскиот јазик е дел од групата словенски јазици, порача Костадинова.
Таа нагласи дека дел од примерите како ВМРО-ДПМНЕ се грижи за македонскиот јазик се навредите кон Конески, политички мотивираната лустрација за Славко Јаневски, пропаѓањето на бројни лекторати по македонски јазик низ Европа.
И денеска како опозиција ширите лажни вести дека македонскиот јазик и идентитет ќе бидат избришани, порача пратеничката на СДСМ Марија Костадинова.
