ВМРО-ДПМНЕ е многу повеќе од политичка партија – тоа е идеја што опстојува низ генерации и симбол што оставил длабока трага во македонската историја, порача претседателот на партијата и премиер Христијан Мицкоски на одбележувањето на 36-годишнината од основањето на ВМРО-ДПМНЕ, што се одржа на Градскиот стадион во Струмица под мотото „Македонија забрзува, наша обврска“.
Во своето обраќање, Мицкоски истакна дека ВМРО претставува име што носи тежина, емоција и историско значење, изградено врз жртвата, борбата и стремежот на многу генерации за слободна и достоинствена Македонија.
Според него, ВМРО-ДПМНЕ денес е најголемиот македонски политички бренд, создаден од историја, пожртвуваност и љубов кон татковината. Тој нагласи дека станува збор за идеја која успеала да опстои низ различни историски периоди, предизвици, победи и разочарувања, задржувајќи ја својата суштинска цел – Македонија да биде самостојна, горда и почитувана држава.
„ВМРО е идеја што има длабоки корени, но и јасна визија за иднината. Во неа се содржани традицијата, патриотизмот и програмата за развој на државата“, рече Мицкоски.
Тој додаде дека токму затоа ВМРО-ДПМНЕ има капацитет да одговори на современите предизвици со кои се соочува државата, преку политики насочени кон економски раст, ефикасни институции, подобри услови за младите и создавање перспективи за граѓаните.
„Наша обврска е оваа идеја да ја чуваме и да ја преточуваме во конкретни резултати. ВМРО не е само дел од македонската историја, туку и сила што треба да ја води Македонија напред“, порача Мицкоски од Струмица.
