ВМРО-ДПМНЕ го прозва градоначалникот на Зрновци: Нема ролер парк, нема пешачка патека, проблем е и водата за пиење

ВМРО-ДПМНЕ го обвини градоначалникот на Општина Зрновци, Ванчо Митев од СДСМ, дека речиси една година по преземањето на функцијата не реализирал ниту еден од најавените проекти за подобрување на водоснабдувањето, инфраструктурата, спортот и културниот живот во општината.

Од партијата посочуваат дека особено загрижувачка е состојбата со водата за пиење, за која, според нив, во изминатите два месеца Центарот за јавно здравје издал два негативни извештаи со забрана за нејзино користење.

— реклама —

„Водата за пиење и понатаму е сериозен проблем. Наместо конкретни решенија за подобрување на квалитетот на водата, во изминатите два месеца беа објавени два негативни извештаи од Центарот за јавно здравје, со кои беше посочена забрана за користење на водата за пиење“, наведуваат од ВМРО-ДПМНЕ.

Партијата тврди дека не се реализирани ниту најавените проекти за оградување на кејот на реката Зрновка, изградба на пешачка патека и потпорен ѕид, како и стационар за кучиња.

— реклама —

Според ВМРО-ДПМНЕ, за поголемите инфраструктурни проекти ветени во изборната кампања не се изготвени ниту идејни решенија, додека дел од постојната инфраструктура е оставен без соодветно одржување.

Критики упатуваат и за состојбите во спортот, тврдејќи дека фудбалскиот клуб згаснал, а претходно реновираното фудбалско игралиште е запуштено. Дополнително, според партијата, бројот на турнирите во мал фудбал се намалил од три на еден годишно.

Меѓу нереализираните ветувања го посочуваат и комплексот со ролер парк и алпинистички ѕид, кој бил најавуван како проект за младите.

— реклама —

ВМРО-ДПМНЕ ја критикува и културната програма на локалната власт, оценувајќи дека најавената „културна револуција“ не се случила, а ветените концерти, театарски претстави и други културни настани не биле реализирани.

„Затоа, јавно го повикуваме Ванчо Митев од СДС да одговори пред граѓаните до кога мисли да седи во градоначалничката фотелја и да не реализира ниту еден проект кој им го ветил на граѓаните?“, прашуваат од ВМРО-ДПМНЕ.

Од партијата порачуваат дека жителите на Зрновци заслужуваат одговорна и транспарентна локална власт, конкретни проекти и подобри услови за живот.

Во доставеното партиско соопштение не е наведена реакција од градоначалникот Митев или од Општина Зрновци на изнесените обвинувања.