Членката на Извршниот комитет на ВМРО-ДПМНЕ и пратеничка, Драгана Бојковска, изјави дека Македонија го започнала процесот за приклучување кон европската иницијатива „Роаминг како дома“, што во иднина ќе им овозможи на граѓаните да користат мобилни услуги во земјите од Европската Унија по цени исти како домашните.
Според Бојковска, оваа иницијатива ќе донесе пониски трошоци за разговори, интернет и СМС-пораки, ќе ја олесни комуникацијата и ќе создаде подобри услови за прекугранична соработка.
Таа посочи дека Владата ја завршила својата обврска преку усогласување на домашната законска рамка со европските директиви и регулативи во областа на електронските комуникации, со што, како што рече, Македонија е подготвена за следната фаза од процесот на приклучување кон европскиот роаминг-простор.
Бојковска направи споредба со опозициската СДС, оценувајќи дека додека тие зборуваат за европската агенда, ВМРО-ДПМНЕ работи на конкретни придобивки за граѓаните.
„Европските процеси не се водат со декларативни изјави, туку со работа, реформи и конкретни чекори“, истакна Бојковска, додавајќи дека Владата останува посветена на модернизацијата, дигитализацијата и европската иднина на државата.
Таа порача дека граѓаните заслужуваат власт која создава резултати и носи политики со директен бенефит за нив и за конкурентноста на македонската економија.
