ВМРО-ДПМНЕ реагира на критиките од СДС за состојбата со пензиите, посочувајќи дека, според партијата, пензионерите во изминатите неполни две години добиле зголемување од околу 7.000 денари.
Од партијата прават споредба со периодот од јуни 2017 до јуни 2019 година, кога, како што наведуваат, пензиите во првите две години од мандатот на СДС биле зголемени за 540 денари.
ВМРО-ДПМНЕ оценува дека СДС нема кредибилитет да зборува за пензиите и тврди дека за време на владеењето на СДС и ДУИ повеќе од 200 илјади пензионери примале пензии под 14 илјади денари.
Од партијата наведуваат и дека пензиите денес се исплаќаат редовно и оти државата обезбедува средства за непречено функционирање на пензискиот систем.
„Пензионерите најдобро знаат како живееја во годините на владеење на СДС и ДУИ, а како живеат денес“, наведуваат од ВМРО-ДПМНЕ.
Во реакцијата, владејачката партија упатува критики и кон економската политика на СДС и Венко Филипче, оценувајќи дека немаат стратегија за развој на државата, привлекување инвестиции и отворање нови работни места.
Од ВМРО-ДПМНЕ порачуваат дека пензионерите заслужуваат повисоки и редовно исплатени пензии, сигурност и достоинствен живот и го повикуваат СДС да не ја користи нивната егзистенција за политички цели.
