„Во 2022 година во јули инфлацијата била над 14 проценти, сега е 2,3 проценти“, рече Мицкоски

Премиерот Христијан Мицкоски на денешната прес-конференција рече дека инфлацијата во Македонија е значително пониска од просекот во Европската Унија, посочувајќи дека годишното зголемување на цените кај нас изнесува 2,3 проценти, додека просекот во ЕУ е 2,93 проценти.

Мицкоски направи споредба со состојбата во 2022 година, кога, според него, земјата се соочувала со двоцифрена инфлација.

— реклама —

„Денес, во Македонија, практично инфлацијата, односно на годишно ниво, цените се зголемени за 2,3 проценти. А цените на мало, во маркетите, се зголемени за 1,8 проценти. Просекот во Европската Унија е 2,93 проценти“, рече Мицкоски.

Тој посочи дека ЕУ е најголем трговски партнер на Македонија и оцени дека разликата во инфлацијата денес е спротивна од онаа што, како што рече, се забележувала во 2022 година.

— реклама —

„Во онаа Влада во 2022 година, кога ја имавме Владата на СДСМ и ДУИ, кога имавме двоцифрена инфлација, која на моменти стигаше и до 20 проценти, не убедуваа дека била увезена. А тогаш просекот во ЕУ беше двапати помал од инфлацијата кај нас. Сега кај нас е двапати помал од просекот во Европа“, рече премиерот.

— реклама —

Мицкоски направи споредба и со други земји од регионот, меѓу кои Словенија, Босна и Херцеговина, Хрватска, Црна Гора, Косово, Албанија, Србија, Романија, Бугарија, Грција и Турција.

Според него, во јули 2022 година Македонија била на деветтото место според инфлацијата меѓу овие земји, додека сега е на второто место со најниска инфлација.

„Тогаш, во јули месец, инфлацијата била над 14 проценти, 14,7, така нешто. Сега е 2,3 проценти. Тоа е разликата меѓу оваа Влада и таа Влада“, додаде Мицкоски.

Премиерот оцени дека актуелните услови се дополнително сложени поради геополитичките случувања и енергетските ризици. Тој направи споредба со 2022 година, кога војната во Украина влијаеше врз светската економија и енергетските пазари, посочувајќи дека денес последиците од војната со Иран и случувањата во Заливот се, според него, уште посериозни.