Министерот за здравство Сашо Клековски најави дека во четврток (20 август) ќе биде објавен епидемиолошкиот извештај за епидемијата во Гостивар, во кој ќе бидат опфатени наодите, постапувањето на институциите и лекциите што треба да се извлечат.
Клековски појасни дека станува збор за извештај кој ќе ги опфати релевантните податоци за периодот од 1 јануари 2026 година до врвот на епидемијата.
„Таму ќе биде наведено што и како и кои институции што направиле. Самите резултати од испитувањето на водата се сопственост на Јавното комунално претпријатие од Гостивар и на Град Гостивар. Она што Министерството ќе го објави се резултатите кои беа релевантни за епидемијата“, рече Клековски.
Тој додаде дека дел од резултатите веќе се достапни во центрите за јавно здравје и ќе бидат објавени, додека податоците што се во надлежност на Јавното комунално претпријатие треба да ги објави самото претпријатие.
Клековски нагласи дека целта е случајот да биде обработен целосно и транспарентно, со јасно утврдени пропусти и научени лекции.
„Фокусот ми е од оваа епидемија да излеземе транспарентно и јасно и со научени лекции. Бидејќи состојбите, особено во Гостивар, се повторуваат и треба структурно да видиме каков е проблемот во водоводот, дали имаме проблеми во реакцијата на институциите, бидејќи повеќе институции се одговорни за ова“, посочи министерот.
Тој ги наведе Јавното комунално претпријатие, Агенцијата за храна и ветеринарство и центрите за јавно здравје, преку националната програма, како институции чие постапување ќе биде опфатено во анализата.
Во однос на тврдењата дека водата во Скопје е загадена со ешерихија коли, Клековски ги отфрли ваквите информации како дезинформации и повика да не се создава дополнителна паника.
„Сензационализмот дека на некоја селска чешма или на некој бунар имало неисправна вода… Во Македонија, во рурална Македонија, плиток бунар, јавна чешма речиси и да нема исправна. И на многу од нив убаво си пишува ‘водата не е за пиење’“, рече тој.
Клековски објасни дека бактериолошка загаденост може да се појави кај вакви локални извори, поради што е важно граѓаните да ги почитуваат предупредувањата и ознаките дека водата не е за пиење.
„Нема потреба од создавање дополнителна паника. Луѓето што живеат во рурални населени места знаат што се пие, што не се пие, најчесто и тоа е означено“, додаде министерот.
