Трета жртва на маларија во Франкфурт, првите две жртви работеле на аеродромот

Маларијата однесе уште една жртва во Франкфурт, со што бројот на починати во исклучително реткото појавување на оваа тропска болест се искачи на три. Последниот починат бил жител на населбата Шванхајм, која се наоѓа во близина на аеродромот во Франкфурт, потврдија германските власти, објави „Ројтерс“.

— реклама —

Градските власти на 27 август соопштија дека двајца вработени на аеродромот починале од маларија, додека четворица други заразени се опоравиле. Најновата жртва е еден од двајцата жители на Шванхајм кои неодамна биле заразени. Лицето починало во Универзитетската болница во Франкфурт.

— реклама —

— реклама —

Маларијата е заразна болест предизвикана од паразити и најчесто се пренесува со убод од заразена женка комарец од родот „Anopheles“. Не се пренесува преку вообичаен контакт меѓу луѓето. Најчестите симптоми се висока температура, главоболка и треска, а без навремено лекување, одредени облици на болеста можат брзо да станат тешки и смртоносни.

Таканаречената аеродромска маларија е исклучително ретка во Европа. Станува збор за случаи во кои заразен комарец од подрачје каде што маларијата е распространета пристигнува со авион и потоа заразува лице во близина на аеродромот.