Директорот на Дирекцијата за заштита и спасување, Стојанче Ангелов, соопшти дека и денес продолжува снабдувањето на граѓаните на Гостивар со вода преку цистерни, бидејќи водата од водоводниот систем сè уште не е безбедна за пиење.
На терен се ангажирани три цистерни – една од Територијалната противпожарна единица Гостивар, една од „Бехтел и Енка“ и една од Општина Боговиње. До попладнето тие веќе извршиле по две дистрибуции, а до крајот на денот се планирани уште по два турнуса.
Ангелов посочи дека во дел од примероците анализирани од Институтот за јавно здравје и понатаму се детектирани бактерии, поради што водата може да се користи само за технички потреби. Процесот на хиперхлорирање продолжува, а се очекува водата наскоро да биде прогласена за исправна.
Во меѓувреме, Министерството за здравство соопшти дека епидемиолошката состојба во Гостивар останува стабилна. Во текот на вчерашниот ден биле регистрирани 84 први прегледи, што е за 27 повеќе од претходниот ден, но значително помалку во споредба со 18 јули, кога биле евидентирани 649 први прегледи.
