Во Грција четири жртви од западнонилска треска, бројот на заразени расте

Грчките здравствени власти регистрираат нов пораст на бројот на случаи на западнонилскиот вирус, а од почетокот на годината четири лица починале како последица на инфекцијата.

— реклама —

Според Националната организација за јавно здравје на Грција (EODI), сите починати биле постари од 65 години, што уште еднаш покажува дека повозрасните лица се најизложени на ризик од тешки компликации.

— реклама —

Заклучно со 29 јули, во земјата се потврдени вкупно 42 случаи на инфекција. Кај 37 пациенти се развиле сериозни невролошки компликации, како енцефалитис и менингитис, додека петмина имале полесна клиничка слика.

Само во текот на изминатата недела биле регистрирани 21 нов случај, а еден е поврзан со патување во земја каде што вирусот е ендемски.

— реклама —

Поради сериозноста на состојбата, 13 пациенти се хоспитализирани, од кои петмина се лекуваат на одделите за интензивна нега.

— реклама —

Експертите потсетуваат дека западнонилскиот вирус се пренесува преку убод од заразен комарец и апелираат граѓаните да преземаат превентивни мерки, особено во летниот период. Во меѓувреме, здравствените служби во Грција продолжуваат со засилен епидемиолошки надзор и внимателно ја следат состојбата.