Во Грција убиле заштитено животно и го испекле среде национален парк

Грчките власти истражуваат пријава според која работници од приватна компанија во Националниот парк Самарија на Крит наводно убиле заштитена критска дива коза, ја испекле и ја изеле.

— реклама —

Истрагата е покрената по наредба на Обвинителството во Ханија, откако се појавиле тврдења дека инцидентот се случил за време на работи за обнова и санирање на штетите во кањонот Самарија.

Според пријавата, членовите на работната екипа, по завршувањето на работните активности, наводно ја убиле дивата коза позната како кри-кри, ја испекле на отворен оган и ја изеле во рамките на заштитеното подрачје.

— реклама —

Случајот го истражува Управата за шуми во Ханија, од каде што потврдија дека ги проверуваат наводите, но засега не можат да потврдат дали инцидентот навистина се случил, ниту да откријат повеќе детали.

— реклама —

Покрај сомнежите за незаконско убивање на заштитено животно, надлежните проверуваат и дали во националниот парк бил запален оган, што би претставувало сериозен ризик поради зголемената опасност од пожари.

Кри-кри е ендемска критска дива коза и еден од најпрепознатливите симболи на островот. Ловот на овој вид е строго забранет, а Националниот парк Самарија е основан во 1962 година токму со цел да се заштити нејзиното природно живеалиште.

— реклама —

Грчките медиуми нагласуваат дека засега станува збор за наводи од поднесената пријава. Дали ќе биде покрената кривична постапка ќе зависи од резултатите од истрагата што ја спроведуваат Управата за шуми и Обвинителството во Ханија.