Во Холандија е потврден првиот случај на еутаназија на неизлечиво болно дете помладо од 12 години, откако во 2024 година законските правила беа проширени и на оваа возрасна група. Детето во моментот на смртта имало речиси две години, со што случајот е опишан како најмлада позната еутаназија.
Холандската министерка за здравство Софи Херманс во јуни соопшти дека кон крајот на 2025 година било еутаназирано дете помладо од 12 години поради тешко заболување. Новиот извештај на комисијата што ги надгледува доцните прекини на бременоста и медицински потпомогнатата смрт кај деца потврдува дека детето било на возраст од речиси 24 месеци.
Детето било родено предвреме, во 26. недела од бременоста, по што следувале сериозни здравствени компликации, меѓу кои и големи оштетувања на мозокот и повеќекратни инфекции. До четвртиот месец од животот развило и сепса.
На осуммесечна возраст му бил дијагностициран Вестов синдром, редок и тежок облик на епилепсија, како и церебрална парализа. Поради нападите имало сериозни нарушувања на спиењето, проблеми со дишењето, напади на кашлање и нарушено голтање.
Според извештајот, во текот на краткиот живот на детето не бил забележан развој или подобрување на неговата состојба. И покрај преземените медицински и немедицински интервенции, родителите и лекарот не забележале подобрување и биле убедени дека детето трпи неподносливо страдање без изгледи за закрепнување.
По разгледувањето на прогнозите и можностите за лекување, родителите побарале од лекарот да го прекине животот на детето. Комисијата заклучила дека лекарот постапил со соодветно внимание во дадените околности.
Холандското обвинителство одлучило да не покрене кривична постапка против лекарот. Одлуката следувала по мислењето на комисијата за проверка, која претходно утврдила дека лекарот постапувал во согласност со професионалните правила.
„Како лекар, се наоѓате во исклучително ранлива положба бидејќи нешто вакво никогаш претходно не се случило. Сè уште имам чувство како речиси една година над мене да висеше Дамоклов меч“, изјавил лекарот.
Еутаназијата на доброволно барање во Холандија е легализирана во април 2002 година, со што земјата стана првата во светот што ја воведе оваа можност.
Според холандските власти, малолетниците може да побараат еутаназија од 12-годишна возраст, доколку се способни да ја проценат и разберат својата состојба. За деца од 12 до 15 години е потребна согласност од родителите или старателите, додека кај младите од 16 и 17 години родителите треба да бидат вклучени во процесот, но нивната согласност не е задолжителна.
Во 2024 година правилата беа проширени и за деца помлади од 12 години кои се терминално болни и неподносливо страдаат без изгледи за подобрување. Во такви случаи, лекарот и родителите може заеднички да донесат одлука за прекин на животот на детето.
Во Холандија минатата година биле регистрирани 10.341 случаи на медицински потпомогната смрт, што ги опфаќа еутаназијата и потпомогнатото самоубиство. Тоа претставува зголемување од 3,8 отсто во однос на 2024 година.
