„Во изминатите 15 години умреле вкупно пет пациенти од западнонилска треска, а сега за само едно лето починаа четворица“, вели Апасиев

Пратеникот и лидер на Левица, Димитар Апасиев, ја оцени како алармантна состојбата со ширењето на западнонилската треска во Македонија, споредувајќи ги овогодишните податоци со статистиката од изминатите 15 години.

— реклама —

Апасиев посочува дека во периодот од 2011 до 2025 година во земјата биле регистрирани вкупно пет смртни случаи од ова заболување, додека годинава, за само неколку месеци, бројот на починати достигна четири.

„Во изминативе 15 години од оваа опасна заразна болест во Македонија умреле вкупно пет пациенти. Значи, само пет луѓе за 15 години досега. А сега, под неспособната вмроидна власт, за само едно лето починаа четворица пациенти“, наведува Апасиев.

— реклама —

Тој посочува дека Македонија, според актуелната состојба, се наоѓа на врвот во Европа, со стапка повисока и од некои медитерански земји каде што западнонилската треска е почеста.

— реклама —

Според Апасиев, ширењето на заболувањето претставува сериозен проблем за јавното здравје и можело да биде спречено со навремени и ефикасни мерки за сузбивање на комарците, кои се преносители на вирусот.

Тој ја обвини актуелната власт дека не презела соодветни мерки навреме и дека проблемот со прскањето против комарци бил проследен со сомнежи за неправилности при јавните набавки.

Апасиев тврди дека со навремена превенција и употреба на соодветни средства за дезинсекција можело да се спречи, како што вели, ескалацијата на состојбата.