Министерството за внатрешни работи ги известува граѓаните дека во понеделник, 27 јули, е најавен штрајк на царинските службеници на грчките гранични премини Евзони (Богородица), Дојрани (Дојран) и Ники (Меџитлија).
Според информациите добиени од надлежните органи на Грција, штрајкот ќе трае од 5:00 до 9:00 часот по македонско време. Во тој период, патничките возила ќе се пропуштаат на секои 10 минути, додека товарниот сообраќај ќе биде целосно во прекин и за влез и за излез од Грција.
Од Министерството за внатрешни работи информираат дека ќе бидат преземени сите неопходни мерки и дека во функција ќе бидат ставени сите расположливи човечки и технички капацитети, со цел полесно одвивање на сообраќајот на македонската страна од граничните премини.
Од МВР апелираат граѓаните кои планираат патување кон Грција навреме да се информираат и да ги земат предвид можните задржувања на граничните премини.
