Во Словенија откриена нелегална фабрика за цигари вредна 30 милиони евра

Во Словенија е откриена најголемата нелегална фабрика за цигари во земјата, во која, според неофицијални информации, биле пронајдени и најмалку 20 странски државјани кои живееле и работеле во тешки услови. Вредноста на запленетата стока се проценува на околу 30 милиони евра, објави „Словенске новице“.

— реклама —

Фабриката се наоѓала во хала во индустриската зона Тримлини, во близина на Лендава и недалеку од граничниот премин Петишовци. Истрагата започнала откако службеници на финансиската управа запреле камион на патот меѓу Лендава и Петишовци.

— реклама —

Според првичните проценки, вредноста на запленетата стока достигнува околу 30 милиони евра, со што оваа акција се вбројува меѓу најголемите заплени од ваков вид во Европската Унија во последно време.

Покрај нелегалното производство на цигари, во халата биле откриени и тешки услови во кои престојувале работниците. Според неофицијални информации, најмалку 20 странски државјани, наводно од Парагвај, биле принудени да работат за криминална организација.

— реклама —

Тие на истражителите им раскажале дека биле заклучени во фабриката и дека најмалку 25 дена не ја виделе дневната светлина. Спиеле во халата, а храна им била доставувана само во вечерните часови.

— реклама —

Словенечката полиција потврдила дека, покрај нелегалното производство на цигари, истражува и сомневања за трговија со луѓе. Според досегашните информации, постои сомневање дека групата што управувала со фабриката била поврзана со меѓународни криминални мрежи.