Во Велес почна изградбата на подземна катна гаража и нов плоштад, а премиерот Христијан Мицкоски очекува објектот да биде пуштен во употреба до крајот на првата половина на следната година.
Мицкоски изјави дека за проектот разговарал со градоначалникот Марко Колев уште во периодот кога тој првпат бил кандидат за градоначалник на Велес.
„Денеска, заедно со велешани, можеме да посведочиме дека е завршена голема работа. Од она што можеме да го видиме, подготовката е направена. Моето искуство вели дека кога подготовката е добро направена, тоа значи 90 отсто завршена работа“, рече Мицкоски.
Според него, доколку изградбата се одвива според предвидениот план, подземната гаража и плоштадот би требало да бидат завршени кон крајот на првата половина на следната година.
„Сигурен сум дека, ако се оди според планот, а не гледам причина зошто да не биде така, кон крајот на првата половина на следната година ќе можеме да го пуштиме овој објект во употреба, за да го користат велешани и да уживаат во новиот плоштад“, изјави премиерот.
Тој најави дека Владата ќе продолжи да ги поддржува инфраструктурните проекти во општините и очекува проектите од првиот и од вториот повик делумно да бидат завршени до крајот на годинава, а останатите на почетокот на следната година.
„Преку ЗЕЛС, општините имаат насоки да подготвуваат проекти за следната година. Цениме дека овие проекти даваат резултати, а тоа се гледа и преку економската активност на македонските компании“, додаде Мицкоски.
Тој му честиташе на градоначалникот Колев за реализацијата на проектот и им се заблагодари на општинските советници, администрацијата, владините претставници, пратениците од Велес и на граѓаните за трпението.
