Водач на култ во Кенија осуден на 200 години затвор за смртта на 191 лице, меѓу кои 190 деца

Водачот на верски култ во Кенија, Пол Мекензи, е осуден на 200 години затвор поради смртта на 191 лице, од кои 190 биле деца. Жртвите починале како последица на систематско малтретирање и изгладнување, спроведувани во рамките на верски обреди, објави Си-Ен-Ен.

— реклама —

Мекензи, основач на црквата „Гуд њуз интернешнл“, ја добил казната во Високиот суд во Момбаса, заедно со повеќе од 20 сообвинети. Казната е поделена на два дела – 100 години затвор за смртните случаи предизвикани со изгладнување и уште 100 години за жртвите убиени со непосредно насилство.

Судењето открило дека Мекензи ги убедувал своите следбеници да ги напуштат домовите и да се преселат во оддалечената шума Шакахола, во источна Кенија. Им ветувал дека постењето ќе ги приближи до Бога и ќе ги подготви за заминување во рајот. Неговото учење се засновало на верувања за крајот на светот, кој, според него, требало да настапи во август 2023 година.

— реклама —

Следбениците добиле наредба да гладуваат за да го „сретнат Исус“. Според планот, најпрво требало да умрат децата, потоа младите и жените, додека мажите требало да останат живи доволно долго за да ги погребаат телата, пред и самите да починат.

— реклама —

Судот утврдил дека верските учења биле користени како средство за присила. Чувари го контролирале движењето на членовите на култот и ги спречувале да ја напуштат шумата. Оние што се противеле биле физички принудувани на послушност, а децата биле врзувани, оставани без храна и казнувани доколку се обиделе да јадат или да избегаат.

Мекензи минатиот месец беше прогласен за виновен за убиство. Судијката Дајана Каведза во образложението навела дека тој преку проповеди и пишани материјали ги убедувал следбениците дека надворешниот свет е зол и дека спасот можат да го најдат единствено во изолацијата во шумата.

— реклама —

Меѓу клучните докази биле пораките од неговиот телефон и разговорите на Ватсап, кои покажале дека бил во постојана комуникација со следбениците и пред нивното преселување во Шакахола, како и дека непосредно ги насочувал нивните постапки.