(Видео) Се урна зграда во Кенија, спасувачите трагаат по затрупани луѓе

Повеќекатница во изградба се урна во Најроби, главниот град на Кенија, при што постои стравување дека голем број луѓе останале заробени под урнатините. Повеќе од десет ката се урнале еден врз друг, оставајќи огромна купчина бетон, објави „Асошиејтед прес“.

Зградата се урнала околу 13 часот на прометна трговска улица во населбата Истли, низ која секојдневно минуваат илјадници луѓе. Шефот на полицијата во Најроби, Иса Мохамуд, изјави дека градежните работи сè уште се изведувале на повеќе од десетте горни ката.

Спасувачката акција била дополнително отежната поради немири во близина. Полицијата употребила солзавец за да ги растера луѓето што почнале да ограбуваат продавници во околината, додека спасувачките екипи се обидувале да стигнат до урнатините.

— реклама —

Џозеф Каула, кој работел на петтиот кат, успеал да избега непосредно пред уривањето. Тој раскажал дека слушнал врисоци и ги видел колегите како трчаат кон излезот, предупредувајќи дека зградата се урива.

„Бев последниот што излезе пред сè да се урне. Целото подрачје се исполни со прашина“, изјавил Каула, додавајќи дека стравува оти неколку негови колеги останале заробени во подрумот.

Полицијата потврдила дека една повредена жена била извлечена од урнатините и пренесена во болница. Спасувачите слушнале и друго лице како повикува помош, но неговиот глас подоцна повеќе не се слушал. Мохамуд предупредил и на опасност од ново уривање, бидејќи дел од срушената зграда се потпрел на соседен објект.

— реклама —

Спасувачката акција првично била отежната поради недостиг на тешка механизација. Екипите со часови ги пребарувале урнатините користејќи дрвени прачки. Подоцна пристигнал багер, кој почнал да ги отстранува големите парчиња бетон, а до вечерта биле донесени уште најмалку две работни машини.

— реклама —

Спасувачите се обидуваат да ги пронајдат просториите во подрумот и приземјето во кои би можело да има преживеани. Во тие делови од зградата веќе работеле продавница за електроника, месарница и продавница за мешовита стока, иако работите на горните катови сè уште траеле.

Жителите раскажале дека некои од нивните блиски, кои останале под урнатините, веднаш по уривањето им се јавиле и побарале помош. Подоцна, телефонските повици кон нив повеќе не биле успешни. Во близина на местото на несреќата бил поставен шатор каде што граѓаните можат да пријават исчезнати членови на семејството. Засега не е познато колку луѓе останале затрупани.

Уривањата на згради се чест проблем во Најроби, каде што локалните власти често се соочуваат со критики поради недоволниот надзор над градежните работи и безбедноста на објектите.

„Ќе биде спроведена истрага. Ќе се погрижиме одговорните за каква било негрижа да одговараат пред судот“, порача Мохамуд.

Гувернерот на Најроби, Џонсон Сакаја, потврдил дека зградата имала градежна дозвола, но немала дозвола за користење. Тоа значи дека продавниците на приземјето не смееле да бидат отворени.

Сакаја побарал локалните власти да добијат поголеми овластувања за надзор над изградбата. Според него, сегашните казни за прекршување на градежните прописи се премали и не ги одвраќаат инвеститорите од опасни постапки.