Водата во четири тетовски села не е безбедна за пиење

Водата за пиење во селата Порој, Џепчиште, Голема Речица и дел од Мала Речица кај Тетово не ги исполнува условите за безбедна употреба, соопшти тетовското јавно комунално претпријатие „Шар“.

— реклама —

Од претпријатието информираат дека по извршените анализи е утврдено отстапување во квалитетот на водата, поради што до жителите е упатена забрана за нејзино користење за пиење.

— реклама —

„Се информираат сите жители на селата Порој, Џепчиште, Голема Речица и Мала Речица, од гробиштата во Мала Речица до Голема Речица, дека по извршените анализи за квалитетот на водата е утврдено дека водата не ги исполнува условите за употреба како вода за пиење“, соопшти „Шар“.

Од ЈКП „Шар“ појаснуваат дека претпријатието не е надлежно за водоснабдувањето во овие населени места, бидејќи тие не се приклучени на градскиот водоснабдителен систем со кој управува претпријатието.

— реклама —

Сепак, поради важноста на состојбата и заштитата на јавното здравје, „Шар“ ги повикува жителите да ја почитуваат забраната и да не ја користат водата за пиење сè додека надлежните институции не излезат со ново известување и не се потврди дека водата е безбедна.