По десетдневната забрана, од денес водата од градскиот водовод во Гостивар може да се користи за одржување на личната хигиена и хигиената во домовите, но и понатаму не смее да се користи за пиење и подготовка на храна.
Надлежните информираат дека последните анализи покажале оти техничката вода е без присуство на колиформни бактерии. Сепак, засега нема информација кога водата ќе биде прогласена за безбедна за пиење, а контролите и анализите продолжуваат.
И покрај ова, на пунктовите за дистрибуција на вода и денес имаше редици граѓани кои чекаа флаширана вода. Дел од нив велат дека и понатаму нема да ја користат водата од чешмите поради страв за сопственото здравје.
Од Министерството за здравство соопштија дека во текот на вчерашниот ден биле прегледани 127 лица кои за првпат побарале лекарска помош поради симптоми на ентероколит.
До официјалната потврда дека водата е безбедна за пиење, жителите на Гостивар ќе продолжат да користат флаширана вода за пиење и подготовка на храна.
