Водата во Валандово повторно е безбедна за пиење

Граѓаните на Валандово од денеска повторно можат да ја користат водата од градскиот водовод за пиење, откако Агенцијата за храна и ветеринарство ја укина привремената забрана воведена поради зголемено присуство на арсен.

— реклама —

Одлуката е донесена по вонредната анализа на Институтот за јавно здравје, која покажала дека концентрацијата на арсен изнесува 1,47 микрограми на литар, што е значително под дозволената граница од 10 микрограми.

— реклама —

Градоначалникот на Валандово, Ѓоко Камчев, соопшти дека не може со сигурност да се објасни разликата меѓу резултатите од двете анализи. Според него, можно е повисоката концентрација на арсен во претходниот примерок да била предизвикана од засилено пумпање на водата, при што дошло до придвижување на наталожени елементи во системот.

— реклама —

Тој најави дека во наредниот период ќе се вршат дополнителни вонредни анализи за континуирано следење на квалитетот на водата.

— реклама —

Препораката водата да се користи само како техничка беше во сила од 22 јули, откако анализите покажаа концентрација на арсен од 14 микрограми на литар. Камчев ги повика граѓаните да се информираат исклучиво преку официјалните анализи и информации од надлежните институции, а не од непроверени објави на социјалните мрежи.