Австралискиот водител Мет Доран јавно и се извини на Адел што не го слушнал нејзиниот нов албум пред интервјуто, поради што таа демонстративно го прекина разговорот.
По двонеделната суспензија што ја доби водителот на утринската програма на австралиската телевизија Channel Seven, водителот јавно и се извини и призна дека го заслужил тоа што му се случило.
„Целиот свет ме исмејува, но да бидам искрен, го заслужив тоа. Направив голема грешка. Интервјуто со Адел беше голема привилегија и успех во мојата кариера. Претпоставував дека не треба да го слушам албумот пред интервјуто затоа што разговорот требаше да се емитува пред неговото објавување. Не бев свесен дека добив целосна снимка од албумот во е-пошта. Го пропуштив најважниот мејл во мојот живот“, изјави Доран.
Интервјуто со Адел беше од големо значење за Channel Seven, за кој работи Доран, особено затоа што тоа требаше да биде единственото интервју што пејачката сакаше да им ја даде на австралиските медиуми.
