Војната со Иран ја чинела Америка над 24 милијарди евра за три месеци

Американскиот претседател Доналд Трамп изјави дека евентуалниот договор со Иран ќе биде „одличен и вреден за трудот“ или воопшто нема да биде постигнат, додека во исто време растат проценките за огромните трошоци што конфликтот веќе им ги нанел на Соединетите Американски Држави.

Трамп нагласи дека нема да прифати договор сличен на нуклеарниот договор што беше постигнат за време на администрацијата на Барак Обама, додавајќи дека преговорите со Техеран нема да завршат додека не бидат исполнети сите американски барања, вклучувајќи гаранции дека Иран нема да развива или набавува нуклеарно оружје.

— реклама —

Според него, времето работи во корист на САД, а поморската блокада кон Иран ќе остане во сила сè до постигнување конечен договор.

Американскиот државен секретар Марко Рубио оцени дека постои напредок во разговорите и дека двете страни се приближуваат кон практичен договор, но предупреди дека воената опција останува на маса доколку преговорите пропаднат.

— реклама —

Од иранска страна, ставовите се повнимателни. Портпаролот на Министерството за надворешни работи, Исмаил Багаеи, изјави дека е постигнат напредок по одредени прашања, но дека е рано да се прогнозира брзо потпишување договор. Тој оцени дека честите промени во американската политика претставуваат сериозна пречка во процесот.

— реклама —

Во меѓувреме, економските последици од конфликтот продолжуваат да се чувствуваат на глобално ниво. Зголемените цени на енергенсите создаваат притисок врз инфлацијата во САД, Европа и Јапонија, додека централните банки внимателно ги следат ефектите врз економскиот раст.

Според податоци на американски официјални лица, трошоците за САД од почетокот на конфликтот на 28 февруари достигнале околу 29 милијарди долари, односно повеќе од 24 милијарди евра. Во истиот период загинале 13 американски војници.

— реклама —

Организациите за човекови права проценуваат дека во конфликтот досега животот го загубиле околу 1.700 цивили, меѓу кои и 254 деца.

Американските медиуми, повикувајќи се на извори од Пентагон, објавуваат дека најмалку 42 воени авиони на американското воено воздухопловство биле оштетени, а дел од нив се целосно уништени или трајно надвор од употреба.