Американскиот секретар за одбрана Пит Хегсет побара од Конгресот итно да одобри дополнителни средства за војската, предупредувајќи дека без нив вооружените сили би можеле да се соочат со сериозен недостиг. Тој предлогот на претседателот Доналд Трамп за одбранбен буџет од 1,5 билиони долари го оцени како историска инвестиција во американската одбрана.
Хегсет се соочи со остри критики за време на сослушувањето пред Комитетот за буџетски средства во Сенатот, каде што изјави дека досегашните трошоци за војната со Иран изнесуваат 37,5 милијарди долари. Сослушувањето беше проследено со повеќекратни прекини од демонстранти.
Тој настапи пред сенаторите само неколку дена откако Пентагон соопшти дека загинале уште тројца американски војници. Со тоа бројот на загинати американски војници се искачи на 17, додека од почетокот на јули се повредени повеќе од 100 припадници на американските сили.
Републиканците подготвуваат пакет вреден 95 милијарди долари, од кој најголемиот дел е наменет за финансирање на војната. Во него се предвидени и средства за други безбедносни потреби, помош за земјоделците погодени од царинската политика на администрацијата на Трамп и измени на изборното законодавство. Белата куќа бара пакетот да биде усвоен без измени.
Демократските сенатори остро се спротивставија на новото финансирање. Сенаторката Пети Мареј оцени дека конфликтот прераснува во уште една долготрајна американска војна, додека сенаторката Џин Шахин праша зошто се бараат нови средства кога, според неа, Пентагон сè уште не потрошил околу половина од 150 милијарди долари одобрени минатата година. Хегсет одговори дека преостанатите средства ќе бидат искористени до септември.
Началникот на Здружениот генералштаб, генерал Ден Кејн, изјави дека не може да процени дали побараните средства ќе бидат доволни за завршување на војната, бидејќи идните трошоци ќе зависат од развојот на ситуацијата на теренот. Тој не даде конкретен одговор ниту на прашањето дали Иран би можел да наплаќа премин низ Ормускиот теснец.
Тензиите дополнително се зголемија кога демократскиот сенатор Гери Питерс ја оцени стратегијата на администрацијата како неуспешна и ја обвини дека нема јасен план за завршување на конфликтот. Хегсет возврати дека таквите оценки се неправедни и ги обвини демократите дека поради политички причини го блокираат финансирањето на војската.
Во меѓувреме, американската војска продолжи со воздушните напади врз цели во Иран, погодувајќи хангари и складишта за беспилотни летала. Нападите следуваа по најавата на претседателот Трамп дека операциите ќе бидат засилени, додека дипломатските напори за обновување на примирјето засега не даваат резултати.
Иранскиот министер за внатрешни работи Ескандар Момени отпатува во Пакистан, кој посредува меѓу Вашингтон и Техеран. Сепак, Трамп изјави дека САД не се заинтересирани за средба сè додека Иран не покаже подготвеност за суштински преговори, а најави и можен напад во близина на главен ирански објект за збогатување ураниум.
Во текот на ноќта беа пријавени експлозии во повеќе ирански провинции, а активирана беше и противвоздушната одбрана во близина на Техеран. Иран возврати со напади врз Бахреин, Јордан и Кувајт, како и врз танкер во Ормускиот теснец, чии членови на екипажот морале да го напуштат бродот.
Судирот сè повеќе се концентрира околу Ормускиот теснец, низ кој пред почетокот на војната минуваше околу една петтина од светската трговија со нафта и природен гас. Поради ескалацијата, цената на нафтата надмина 92 долари за барел, додека просечната цена на бензинот во САД достигна четири долари за галон.
Истовремено, јеменските Хути прогласија поморска блокада на Саудиска Арабија и ги предупредија трговските бродови да го избегнуваат теснецот Баб ел Мандеб. Според објавените информации, во досегашниот тек на конфликтот се повредени повеќе од 500 американски војници.
