„Волстрит џурнал“: Трамп го промени ставот кон Зеленски

Американскиот претседател Доналд Трамп значително го променил својот став кон украинскиот претседател Володимир Зеленски и сега покажува многу поголем оптимизам во однос на способноста на Украина да ѝ се спротивстави на Русија, објави „Волстрит џурнал“, повикувајќи се на американски официјални претставници.

Според весникот, ова претставува значителен пресврт во однос на неговите претходни изјави. Минатата година Трамп го нарече Зеленски „диктатор“, јавно го критикуваше неговото раководење со земјата, влезе во конфликт со него во Белата куќа и привремено ја суспендираше американската воена помош и разузнавачката соработка со Украина.

— реклама —

„Всушност, развивме добри односи. Тешко е да се поверува, нели?“, изјавил Трамп за време на нивната средба на маргините на самитот на НАТО во Турција ова лето.

— реклама —

Новиот, попозитивен тон доаѓа непосредно пред нивната средба во Белата куќа. Зеленски престојува во Вашингтон по повод погребот на сенаторот Линдзи Греам, а разговорите со Трамп се закажани за денес.

Според американски официјални лица, една од главните причини за промената на ставот на Трамп е неговото сè поголемо почитување кон украинската индустрија за беспилотни летала. Тој бил особено импресиониран од способноста на Украина да се брани од напади со беспилотни летала, вклучително и од иранските дронови „Шахед“.

— реклама —

Во меѓувреме, Украина стана еден од водечките производители на воени беспилотни летала, а производството порасна од неколку илјади на милиони единици годишно. Трамп, според извештајот, ја разгледува и можноста за соработка во производството на беспилотни летала, како и издавање лиценца на Украина за производство на пресретнувачи за системот „Патриот“.

— реклама —

Сепак, „Волстрит џурнал“ наведува дека останува неизвесно колку долго ќе трае ваквиот пристап на Трамп кон Киев. Извори блиски до американскиот претседател велат дека тој често ги менува своите ставови, а рускиот претседател Владимир Путин и претходно успевал да влијае врз неговите позиции.

Трамп неодамна му порачал на Путин дека сака завршување на војната, истакнувајќи ги големите загуби на двете страни. Иако претходно сметал дека Русија брзо ќе ја порази Украина, сега, според американски официјални претставници, покажува значително помалку симпатии кон рускиот лидер.