Возел во рикверц на словенечки автопат, двајца загинати, дете се бори за живот

Во тешка сообраќајна несреќа што се случила ноќеска на автопат во Словенија, загинале две лица, а дете е тешко повредено и е во животна опасност. До несреќата дошло откако 28-годишен возач го запрел автомобилот на автопатот и почнал да вози наназад, по што во него удрило комбе.

Несреќата се случила околу еден часот по полноќ на Штаерскиот автопат, кај одморалиштето Луковица, во правец кон Марибор, соопшти Полициската управа Љубљана.

— реклама —

Според првичните информации од полицијата, 28-годишен странски државјанин управувал автомобил со романски регистарски таблички. Откако го поминал излезот за одморалиштето Луковица, застанал на десната сообраќајна лента и почнал да вози наназад.

Во тој момент, во неговиот автомобил удрило комбе што се движело зад него.

— реклама —

Во судирот загинале двајца патници кои седеле на задните седишта во автомобилот. Двајцата биле романски државјани.

Тешко е повредено и дете кое се наоѓало во автомобилот. Станува збор за дете со француско државјанство, а полицијата потврдила дека неговиот живот е во опасност.

— реклама —

Возачот на автомобилот и неговата сопатничка, кои седеле на предните седишта, се здобиле со полесни повреди. Полесно бил повреден и словенечкиот возач на комбето.

На местото на несреќата пристигнале пожарникари кои морале да користат специјална опрема за да ги извлечат од уништениот автомобил двете лица кои останале заробени во возилото.

Екипите на итната медицинска помош згрижиле четворица повредени и ги пренеле во Универзитетскиот клинички центар во Љубљана.

Поради несреќата и интервенцијата на итните служби, автопатот во правец кон Марибор бил привремено затворен.