Возење без дозвола, со преголема брзина и алкохол – низа санкции во Тетовско

Од СВР Тетово информираат дека во текот на изминатиот ден, СВР Тетово и ОВР Гостивар спровеле засилени сообраќајни контроли, при што се лишени од слобода повеќе лица поради безобѕирно управување со моторни возила, а неколку возила се одземени.

— реклама —

Во првиот случај, на улица „101“ во Гостивар е лишен од слобода А.Т. (23) од село Трново, кој управувал патничко возило „рено“ со тетовски регистарски ознаки без положен возачки испит. Возилото е одземено за понатамошна постапка, се наведува во соопштението.

На патот Тетово–Гостивар е лишен од слобода И.А. (29) од Гостивар, кој управувал патничко возило „бмв“ со гостиварски регистарски ознаки без возачка дозвола. И во овој случај возилото е одземено.

— реклама —

Во третиот случај, во село Калник, општина Боговиње, по претходно случена сообраќајна незгода е лишен од слобода А.И. (26) од село Новаке, кој управувал возило „бмв“ без положен возачки испит. Возилото е одземено за понатамошна постапка.

— реклама —

На автопатот Гостивар–Тетово, кај наплатната станица Тетово, со возило пресретнувач е измерена брзина од 178 километри на час на возило „мерцедес“ со гостиварски регистарски ознаки, на место каде што дозволената брзина е 80 километри на час. Возачот К.И. (42) од село Чегране е лишен од слобода, а возилото е одземено.

Исто така, на автопатот Тетово–Скопје е лишен од слобода Т.Б. (42) од село Митрашинци, кој управувал возило „форд“ со беровски регистарски ознаки. При алкотестирање кај него се констатирани 2,38 промили алкохол во крвта, а возилото е одземено.

Од полицијата информираат дека по целосно документирање на случаите ќе следуваат соодветни пријави.