„Времето на автократите завршува“ – Зајкова и ЛДП со порака по изборите во Србија

Либерално-демократската партија (ЛДП) и нејзината претседателка Моника Зајкова ја поздравија прогласената победа на студентската листа на парламентарните избори во Србија, оценувајќи дека граѓаните покажале оти демократската волја може да ги надмине политичките притисоци и долгогодишните модели на владеење.

Од ЛДП порачаа дека студентите, младите и граѓаните на Србија покажале дека народот е носител на суверенитетот и дека ниту една власт не може да биде посилна од барањата за слобода, правда и владеење на правото.

— реклама —

Партијата го оцени изборниот исход како удар врз, како што наведува, автократските системи што се потпираат на контрола врз медиумите, злоупотреба на буџетските средства, партизација на институциите и манипулации со изборниот процес.

„Студентите и граѓаните на Србија покажаа дека со енергија и одлучност можат да бидат тие кои ќе одлучат за иднината на својот народ – надвор од сите манипулации, надвор од злоупотребата на медиумите, надвор од вклучувањето на буџетот во служба на една партија и надвор од воспоставените автократски матрици! Србија покажа дека единствено народот е суверен“, изјави Зајкова.

— реклама —

Таа нагласи дека борбата против корупцијата, еднаквоста пред законот и европската интеграција треба да бидат основа на политичките промени во регионот.

„За ЛДП, казнивост за корупцијата мора да има, правда мора да има подеднакво за сите, а за единството и европскиот пат нема алтернатива. Ова е доказ за целиот регион дека единствено демократијата, транспарентноста и одлучноста на граѓаните победуваат“, порача Зајкова.

— реклама —

Од партијата изразија надеж дека политичките промени ќе придонесат Србија да се насочи кон европската интеграција, оценувајќи дека изборниот исход испраќа порака и до останатите политички лидери во регионот.

„Оваа победа е јасен сигнал и предупредување за сите регионални политичари кои мислат дека со контрола, монопол и трошење на народни пари можат вечно да го држат сопствениот народ во заложништво“, наведуваат од ЛДП.

Во завршната порака, партијата оценува дека времето на автократските модели и партиските монополи завршува, а демократијата, праведноста и европската иднина на Балканот немаат алтернатива.

Реакцијата следува по признавањето на изборниот пораз од Александар Вучиќ и објавувањето на прелиминарните процени според кои студентската листа обезбедува парламентарно мнозинство. Конечните резултати треба да ги потврди Републичката изборна комисија на Србија.