Врховниот суд го објави образложението на одлуката со која ги уважи барањата на осудените за автобуската несреќа кај Ласкарци, во која загинаа 16 патници, и ја укина пресудата на Апелациониот суд. Според највисокиот суд, Апелација не дала доволно конкретни одговори на клучните жалбени наводи и не образложила на кој начин дејствијата на осудените се поврзани со несреќата и врз основа на кои докази е утврдена нивната кривична одговорност.
Во одлуката се посочува дека вештачењата и супервештачењето како причина за несреќата го наведуваат пропустот на возачот Маноил Трифуновски, кој беше осуден на 14 години затвор. Истовремено, била утврдена и неисправна техничка состојба на автобусот, но, според Врховниот суд, не било објаснето во која мера таа влијаела врз несреќата.
Судот оценува дека не е дадено доволно образложение ниту за поврзаноста на дејствијата на останатите осудени со несреќата. Меѓу нив е и сопственикот на „Дурмо турс“, Дурмиш Белули, чија казна од првично четири години затвор Апелација ја зголеми на 10 години.
Во образложението се наведува и дека од вештачењата произлегува оти автобусот бил насочен кон лево, по што ја напуштил средната сообраќајна лента. Според утврдените растојание и време, возачот немал техничка можност со сопирање да го избегне контактот со првата еластична метална ограда. Врховниот суд дополнително укажува дека нема траги од сопирање, кои би биле присутни при сопирање, независно од ефикасноста на системот за сопирање.
Врховниот суд забележува и дека Апелација недоволно ги разгледала приговорите за начинот на водење на постапката. Како пример е наведено барањето на Трифуновски за супервештачење во врска со неговата здравствена состојба. Според судот, требало да се утврди дали таквото вештачење било неопходно, особено доколку постоеле спротивставени вештачења.
Во одлуката се оценува дека првостепената пресуда имала претежно дескриптивен пристап, односно главно ги презентирала доказите без доволно образложение на причините за донесените заклучоци. Апелација, според Врховниот суд, не ги отстранила овие недостатоци, туку дала воопштени одговори на суштествените прашања поврзани со кривичната одговорност.
Од Апелациониот суд кратко информираат дека предметот „Ласкарци“ е доставен до судот и е распределен кај нов судија известител. Претходниот известител, судијата Зоран Димитриевски, во меѓувреме бил избран за судија во Врховниот суд.
Белули, кој по првичната пресуда на четири години затвор доби зголемена казна од 10 години, и понатаму се наоѓа во затворот „Идризово“. Шефот на возниот парк на „Дурмо турс“, Ремзи Мифтари, и натаму е во бегство.
